به‌رپرسێ لژنا ره‌وشه‌نبیرى ل بنگه‌هێ لالش ل دهۆكێ راگه‌هاند؛جه‌ژن و هه‌لكه‌فتێن ئایینى یێن ئێزدیان گرێدایى سروشتى نه،له‌وا ژڤانێ وان دناڤبه‌را رۆژه‌ك بۆ شه‌ش رۆژان دئێته گهۆرین،جه‌ژنا بێلندێ ژى ئێكه ژكه‌ڤنترین جه‌ژنێن ئێزدیان و ل سالا داهاتى دكه‌فته رۆژا 7/1/2022.
شه‌مۆ قاسم، به‌رپرسێ لژنا ره‌وشه‌نبیرى ل بنگه‌هێ لالش ل دهۆكێ بۆ(تۆرا لالش) راگه‌هاند؛جه‌ژنا بێلندێ( جه ژنا رۆژێ) ئێكه ژكه‌ڤنترین جه‌ژنێن ئێزدیان و ڤه‌دگه‌رته ده‌مێ میترایا وبوونا میترایه،ئه‌ڤ جه‌ژن ب پیرۆزیا رۆژێ ڤه گرێدایه وچه‌ندین ملله‌تێن دى ژى ڤان رێوره‌سمان دگێرن.
هه‌روه‌سا گۆت:”په‌یڤا بێلنده په‌یڤه‌كا ئارامیه رامانا بوون یان نووكرن دئێت ئانكو رۆژ بازنێ خۆ ته‌مام دكت وبه‌ره‌ف بورجه‌كا نوو دچت وئه‌رد خۆلا خۆ یا به‌ره‌ف نشیڤ ته‌مام دكت لدۆر رۆژێ و ده‌ست بڤه‌گه‌ریانا خۆ به‌ره‌ف هه‌ڤراز دكت ل ئینیا سێیێ ژ كانوونا ئێكێ یا ب هژمارا رۆژهلاتى،ل هێڤارا جه‌ژنێ هه‌ر ماله‌ك ئاگره‌كى هلدكه‌ت ودبێژنێ گوركا گاى یان گوره پیتك هه‌موو ئه‌ندامێن مالێ خۆ سێ جارا ب سه‌را دهاڤێژن ودبێژن یا خودێ توو گونه‌هێن مه ب سۆژى، دیسا خوارنه‌كا تایبه‌ت دئێته چێكرن دبێژنێ میرهه(كه‌شكین) وسه‌وك دئێنه پاتن ونانه‌كى تایبه‌ت دئێته دروستكرن دبێژنێ (خه‌ولێره) ومێویژه‌كێ دكه‌نه دناڤ دا وباش دسترین هه‌تا ئه‌و مێویژ دناڤ دا هندادبت وپاشى دقه‌لینن ول هێڤاریا رۆژا جه‌ژنێ ب رێوره‌سمه‌كا تایبه‌ت دئێته شكاندن وبه‌لاڤكرن لسه‌ر ئه‌ندامێن خێزانێ، بێ فه‌رق وجوداهى چ نێر یان مێ بت و كه‌سێ ئه‌و مێویژ دبه‌هرا وى دا چۆ دێ ئێته خه‌لاتكرن ودبێژن ره‌وشا سالا نوو لسه‌ر به‌ختێ وى یه”.
به‌رپرسێ لژنا ره‌وشه‌نبیرى ل بنگه‌هێ لالش دیاركر:”هنده‌ك رێوره‌سمێن دى ژى دئێنه گێران ل ئینیا به‌رى بێلندێ ودبێژنێ بێلندا پیرا و ل هنده‌ك جیا وتایبه‌ت ل شنگالێ دبێژنێ میلمیلاڤ وئه‌ڤه ئه‌و رێوره‌سمێن دئێنه گێران 1_جەژنا بێلندا پیرا وهنده‌ك دبێژنێ (پێلندێن پیرافات) جەژنەكا كەڤنه بەرى ھاتنا شیخادى ئەڤ جەژن دهاته گێران وەك ئەركەكى ئۆلى ھەر سال ئەڤ جەژن دكه‌فته دئینیا ئێكێ دا ژ چلێ زڤستانێ و مجێورێن پیرافات ب چەند ڕێوڕەسما و ل ھەر گوند و جیەكی نیشانێن پیرافات ھەبن ڤان رێورەسما دگێرن، رێورەسم ژى بڤی رەنگی نە1_:ل ھێڤاریا جه‌ژنێ چرایێ خاسێن گوندی دئێنە ھلكرن و ھەر مالەكا پیرێن پیرافات ھەبت چرایى ھلدكن وخەلكێ گوندی و ریهـ سپى و كەسانێن ئایینی قەستا مالا مجێورێ گوندی دكن و ل جیەكى خرڤه دبن وگوهـ دده‌نه قەول وبه‌یت و قەسیدە ئه‌وێن دئێنه گۆتن ژلایێ ئۆلداره‌كى ئایینى ڤە ول وێ شەڤێ ھەتا بەرێ سبه‌یكێ ئه‌و رێوره‌سم دئێنه گێران و ل سبه‌یكا ڤێ رۆژێ سمات دئێته چێكرن و دبێژنێ(كەشكا مالا پیرا) ول مالا مجێوری و لسەر گوندیا دئێتە بەلاڤكرن ،دیسا سبەیكێ خەلكێ گوندی قەستا مالا مجێورى دكن ژبۆ پیرۆزباھیا جەژنێ و پێكڤە سماتێ و شریناھیێ دخۆن،2_میمیلاڤا جوانا ئه‌ڤ رێوره‌سمه بتنێ دناڤ هۆزا جوانا دا دئێنه گێران ئه‌وێن ل چیایێ شنگالێ د به‌لاڤن،ئه‌ڤ جه‌ژنه دئێته گێران وه‌ك رێزگرتنه‌ك بۆ خاس و چاكێ ئێزدى پیرێ ئالى”.
شه‌مۆ قاسم ئاشكه‌راكر ژى جه‌ژنا بێلندێ ژى ئێكه ژكه‌ڤنترین جه‌ژنێن ئێزدیان و ل سالا داهاتى ئه‌ڤه جه‌ژن دكه‌فته رۆژا 7/1/”2022
تۆرا لالش: شه‌مۆ قاسم
تعليقات
إرسال تعليق