په‌یاما مه‌سرور بارزانی سه‌رۆكێ حكومه‌تا هه‌رێما كوردستانێ ب هه‌لكه‌فتا بیره‌وه‌ریا ئه‌نفالا بارزان
ئه‌ڤرۆ دێ بیره‌وه‌ریا ئێك ژ تاوانێن مه‌زنێن نه‌هێنه ژبیركرن یێن رژێما به‌رێ یا عیراقێ سازكه‌ین، كو كۆمه‌لكوژى و جینوسایدكرنا نێزیكى هه‌شت هزار مرۆڤێن بێ تاوانێن بارزانینه. بیره‌وه‌ریا قوربانیێن ڤێ تاوانێ، ئه‌ڤساله زۆر دلئێشتره، چونكى دهه‌مانده‌م دا روفاتێن سه‌د ئه‌نفالكریێن دى یێن بارزانى دێ ئینن، كو ل بیابانێن باشوورێ عیراقێ بۆ كوردستان و وارێ وان ل بارزان.
ده‌ڤه‌را بارزان، زێده‌تر ژ سه‌ده‌یه‌كێ یه مه‌لبه‌ندێ كوردایه‌تى و شوره‌ش و راپه‌رینێ بویه ل دژى زولم و زوردارى و داگیركاریێ. په‌ناگه‌هه‌كا لێبوورین و ئارامیێ بوویه، بۆ وان هه‌مى كه‌سێن ل دژى بێدادى و سته‌م بسه‌رى هاتی، ژبه‌رهندێ هه‌مى ده‌مان ئه‌و ده‌ڤه‌ر وه‌كى هه‌مى ده‌ڤه‌رێن دى یێن كوردستانێ، به‌رهنگارى هێرشێن له‌شكه‌رى و وێرانكارى و بومبه‌باران و بكارئینانا چه‌كێ نه‌یاسایى بویینه.
هێرشا جینوسایدا بارزانیان، پشكه‌كه ژ زنجیرا تاوانا دژى ڤێ ده‌ڤه‌رێ و هه‌موو ده‌ڤه‌رێن دى یێن كوردستانێ، كو بویه ده‌ستپێك بو ئه‌نجامدانا هێرشا ئه‌نفال و كیمیابارانكرنا كوردستانێ.
ل بیره‌وه‌ریا كومه‌لكوژى یێن ب ڤى ره‌نگى، ب رێزو ته‌قدیرڤه بیره‌وه‌ریا شه‌هیدێن ئه‌نفالكریێن بارزانیان و سه‌رجه‌م شه‌هیدێن كوردستانێ دكه‌ین، بیره‌وه‌ریا جینوسایدا بارزانیان، د هه‌مانده‌م دا بیره‌وه‌ریا هه‌موو ئه‌نفالكری و شه‌هیدێن كورد ل گه‌رمیان و بادینان و بالیسان شێخ وه‌سانان و كوردێن فه‌یلى و شنگال.
هه‌روه‌سا پێتڤیه ب زانیاریڤه، بیره‌وه‌ریا قوربانیدان و خوراگریا دایكێن مێهره‌بان و كه‌سو كارێن قوربانیان بكه‌ین، كو زور ب سه‌ربلندى به‌رهنگارى نه‌خوشیێن ژیانێ یێن ڤێ تاوانا مه‌زن بووینه. هه‌روه‌سا سوپاسیا جامێرى و هاریكاری و هه‌فسوزیا خه‌لكێ هه‌ولێر و ده‌ڤه‌رێن دى یێن كوردستانێ دكه‌ین بۆ كه‌سوكارێن ئه‌نفالكریان.
ل ڤێ بیره‌وه‌ریێ، جاره‌كادى ئه‌م د رژدین لسه‌ر قه‌ره‌بوكرنا كه‌سوكارێن قوربانیێن هێرشا جینوساید و ئه‌نفالێ دكه‌ین، كو پێدڤیه حكومه‌تا فیدرال، ب ره‌نگه‌كێ ژ هه‌ژى قه‌ره‌بو بكه‌ن هه‌روه‌كى د ده‌ستوورى دا هاتى، بابه‌تێ قه‌ره‌بوكرنا قوربانیێن ده‌ستێ رژێما به‌رێ ، هاتینه پشتگوهـ هاڤێتن نابیت جاره‌كا دى ئه‌ڤ بابه‌ته بهێته پشتگوهـ هاڤێتن.
پێدڤیه گه‌لێ كورد، هه‌مى ده‌مان ئه‌ڤ تاوانێن به‌رامبه‌ر گه‌لێ كورد هاتینه كرن ل بیرا وان بن، جاره‌كادى ل بن هیچ بهانه‌ك و مه‌ره‌مه‌كێ، نابیت ئاماده‌بن ئازادى و حوكمرانى خه‌لكێ كوردستانێ بكه‌نه قوربانى و ژ ده‌ست بده‌ن.
ل بیره‌وه‌ریا جینوسایدا بارزانیان، سلاڤ ل گیانێ پاكێ سه‌رجه‌م شه‌هید و ئه‌نفالكریێن كوردستانێ.
هه‌مى ده‌مان ل بیرامه‌نه و ب رێزڤه بیریا وان دكه‌ین.
مەسرور بارزانی
سەرۆکێ حکومەتا هەرێما کوردستانێ
31ی تەمموزا 2022
تعليقات
إرسال تعليق